لك ااااااخ ملا جيل

لك تفوووو عليك من بين الشباب , انت شب انت ؟ لك سكوت سكوت .
لك تفوووو عليك لما بتمييش شعرك منشان تلفت الانظار .
لك تفوووو , لك يا فهيم لك تضرب اذا كان مظهرك هو يلي بدو يحبب البنات فيك .
لك تضرب بعينك من بين الشباب , لك انت شب انت ؟ لك خراس .
مسحّل بنطلونك ! على شو ؟ اه , شو بدك تقول يعني ؟؟ لك شو هالمنظر !
لك شبك شبك , لك منظرك متل شحادين الشوارع .
لك ليش هيك هزيل و ضعيف ؟؟ ليش مساوي حالك متل الهضيلة ؟ لك شوهااااااااااااااد ؟
لك رتب حالك والبس متل ما بيلبقلك مو تلحق الموضة يا .. يا ...... لك حسبي الله بس فيك .
لك ابني , من زمان قالو : كول ما تشتهي و لبيس ما يليق بالناس .
لك انت شب انت ؟؟ انت يلي اذا خلص الخبز من البيت , عادي و إذا فضيت علبة " جيل " بتمرض و ما بتنزل عالشارع .
لك شبك شبك ؟؟ طول مالك ماشي عم تشيل شعرات الغرة من على عيونك متل البنت لما بتتغمى لحبيبها .

لك أخ بس أخ .

لك بالماضي الشب يحب و يعشق بعيونو و بتطليعة وحدة يشبك البنت و تشبك و تتشعبق بقلبو و مشاعرو كلها و اذا ما تجوزو يمرضو و ينعللّو علّ , لك انت من ضعفك و عدم ثقتك بحالك رايح جاية تلميح لهي و هي انو عم تفكر بالاستقرار و الجازة و انت بالحقيقة كذاب , اي كذاب أشر , مفكر حالك بعد كل هاد رح تخطب وحدة ما باس تمها إلا أمها ع اساس هي خطبة " أمك الحجة " , اي اي , استنى و الله ما رح تاخد وحدة غير عالمضمون , نص الحارة بتعرف انها ممتازة و مرتبة و لايقة كمان .

لك ركوز ركوز , لك ركوز , هداك اليوم شفتك شفتك مع رفقاتك البنات بالشغل , شفتك و انت متل المسخرة عم تمزح و تهرج و تخفف دم قال يعني و حواليك البنات مجتمعات عم يضحكو , لك يا بهيم عم يضحكو عليك مو معاك و انت مقلل قيمتك بالاراضي .
لك الشب الواثق هو يلي بيمزح مزحتو و هو معبي مركزو لحتى يشوف الضحكة بعيون البنت يلي ادامو مو بشداقها , يلي بتضحك بعيونها و هية عم تتطلع فيك مو غشيانة من الضحك و مسكرة عيونها عنك .

لك جدك و جد جدك لما كان يمشي و كانت النسوان تقتل عليه و يتمنو سيرتو , لا كان يلبس قصير و لاكان يفرجيهم مطاط " سليبو " و لا كان يفتح صدرو , كان كلو هيبة و ترتيب و كياسة و دقن حلوة و شي على كيفك .
لك مين قال مين قال انو انت صح ؟؟ مين قاااال ؟؟

أبوك ابوك لما تزوج امك كان شكلو مسخرة ؟؟
لك ليش مفكر انو لازم الشارع كلو يعرف انك خفيف الدم لحتى عم تمزح و تحرك حركات فجلقة بالشارع ؟ لك مزاح بالحكي و ضحك و ضحاك بس خليك مالي هدومك و وازن .

لك ملليت منك ملييت منك و من سيرتك و قرفت , قرفت من شكلك , لك لعمى ضربك ضرب , انقلع مو وشي , رووووح الله يغضب عليك دنيا و أخرى , و يقرف عمرك قبل ما تتجوز و تخلف لانو إذا انت هيك , اي شو بدو يطلع من أبنك !!!

============

و انتي وليك تعي تعي فهيمة خانم , شو غبية انت ؟؟ لك قالو يلي ما بيشوف من الغربال أعمى .

لك شو عاجبك بهالـ طنط هاد ؟؟ لك انتي بدك منظر ولا بدك رجال ؟؟ رجال يشتغل و يعرف كيف يدبر امورو مو بس علق علقة راح ركض لعند البابا . رجال يعرف كيف يجيب فلوس بدون ما ينصب و ينهب .
لك بدك واحد ما يغلط بحقك , يكون واثق من حالو , مو عند اهلو ما كان يحكم على بصلة و يجي لعندك و يصير رجال و بدو كلمتو تمشي عليكي و على اهلك .
لك بدك واحد مو همو بالدنيا المظاهر و البريستيج المصطنع , كلمة عربي و نص انكليزي , لك اشبك ؟؟ راسك هااااااد بدو نفض .
لك لسى بتقوليلي هالشب ذكي و حربوق , طيب اذا مو مبين شو نهاية المطاف و انتي وحدة من كذا وحدة , لك شو بدك منوووووو , خلص . تسلاية ؟؟؟ مو هيك التسلاية بتكون لا معلقة و لامطلقة .
لك شبك ؟ ليش متوقعة انو لازم يكون متلِك درويش ليقتنع فيكي ؟؟ يعني ايمتا كانت المصاري هية المقياس لحتى يتزوجك ؟
ليش متوقعة انو سعادتك مع الغني و رح يسعدك ؟؟ ممكن يلبسك و يزهزهك بس يتركك بقهرك ليالي طويلة و هو سهران هون و هون .
مين قال انو اذا حسنتي تاخدي شب مدوخ الدنيا رح تحسني تعدلي وضعو مو تقضيها دوخانة وراه و ورى سيرو و قصصو يلي مارح تخلص لانو بيعتبرها سبب لدوام شبوبيتو .

لك شو بدك بهالشب يلي دائماً مفكر كل بنت بالشارع مشروع غزال للصيد .
لك يا ..... لك يا ... حسبي الله , يا بنتي , يلي متعود ع الفتل بين الصبايا مافيه يغير عادتو إلا إذا الله اتطلع بوجهو , بس وين وجهوا من الله ؟؟

لك شلون يعني فتللك عقلك .؟؟ يعني سيطر عليكي و لا حسن يقنعك بحالو ؟؟ طيب و بعدها ؟؟
لك إذا شايفك و هو متأكد انو انتي بنت منيحة , ليش ما عم يقرب ؟؟ ليش ناطرتيه ؟؟ لك ادفشيه , الله كريم , لك اظفرك برقبتو , عرفي قيمتك بقى .
لك يامو خيفانة من العنوسة .؟؟؟ اي انا خيفان كمان من الندم و لا مو سبب كافي للتفكير .

لك روحي خلصيني بقى , فلتت قصتك ع الاخير و ماعاد مبين وين رايحة , و ياخوفي ياخوفي من ساعة تركيب العداد , اي العداد يلي بتقعدي مع حالك و مضى عليكي ايام و تجارب تعديها و انتي قاعدة عم تضربي ايد بأيد مفلسة .

ليش بتقولي ما بحب حدا يلمس جسمي غير حبيبي و عم تسمحي لهاد و هاد يلمس روحك ؟ شو روحك يعني مالها قيمة و قداسة عندك ؟؟

لك اوووووف اووف , مدري مين الغلط , انا و جدودك و لا انتو و جيلكن .؟

بس اكيد الصح هو يلي بيعرف قيمتو و كرامتو و بيبعدها عن اللعب يلي بيلعب فيها هالشب الشاطر و البنت الحربوقة .